बढ्दै छ गुगल प्लसको लोकप्रियता

बढ्दै छ गुगल प्लसको लोकप्रियता

पुष १४ – आफ्नो प्रतिद्वन्दी गुगल प्लसको बढ्दो लोकप्रियता फेसबुकको लागि टाउको दुखाईको विषय बनेको छ । सामाजिक सञ्जाल गुगल प्लसले फेसबुकलाई चुनौति दिँदै सेवा सुरु गरेको ६ महिनामै प्रयोगकर्ताको संख्या ६ करोड पुर्‍याएको छ । 

गुगलको आधिकारिक ब्लगले गुगल प्लसमा दैनिक ६ लाख २५ हजारका दरले प्रयोगकर्ता बढिरहेको जनाएको छ । सामाजिक सञ्जाल सम्बन्धि अध्ययन गर्ने वेबसाइट म्यासेबल डट कमले सन् २०१२ को फेब्रुवरीको अन्त्यसम्ममा गुगल प्लसका प्रयोगकर्ताको संख्या १० करोड पुग्ने अनुमान गरेको छ । यस्तै अगस्ट महिनाको अन्त्यमा गुगल प्लसले प्रयोगकर्ताको संख्या २० करोड पुर्‍याउने र सन् २०१२ को समाप्तीसम्ममा ४० करोड मानिस गुगल प्लसको सञ्जालमा जोडिने म्यासेबलको अनुमान छ । 

 

सन् २००४ को फेब्रुवरीमा सुरु भएको फेसबुकमा हालसम्म ८० करोड प्रयोगकर्ता छन् । स्थापना भएको छोटो समयमा नै गुगल प्लसले गरेको प्रगतिका आधारमा केही वर्ष भित्रै यसले फेसबुकलाई पछाडी पार्न सक्ने म्यासेबलले बताएको छ । 

 

गुगल प्लसमा एकाउन्ट बनाउन १८ वर्ष पुग्नुपर्छ भने फेसबुकले १३ वर्ष पुगेका सबैलाई आफ्नो नेटवर्कमा जोडिन दिने गरेको छ । एकातिर गुगल प्लस फेसबुकलाई उछिन्ने उद्देश्यमा लागेको छ भने अर्कोतिर फेसबुक पनि आफ्ना प्रयोगकर्तालाई समयसमयमा नयाँ नयाँ फिचर पस्केर चुप नबसेको संकेत दिइरहेको छ ।

 

कतिपय सामाजिक सञ्जालका अनुसन्धानकर्ताहरुले हालसालै फेसबुकले ल्याएको टाइमलाइनलाई पनि गुगल प्लससँगको प्रतिस्पर्धाको रुपमा हेर्ने गरेका छन् ।